Жаңалықтар

15 шілде күні Марат Оспанов атындағы Батыс Қазақстан мемлекеттік медицина университетінде «жалпы медицина» факультетінің түлектеріне диплом тапсыру салтанатты рәсімі өткізілді. 500-ден астам студентке жоғары білім алғандығы жөнінде диплом берілді. Олар білімді мамандар қатарын толықтырды, көбісі болашақ кәсібін меңгеру барысында оқу үздігі атанып, университеттің қоғамдық өміріне белсене араласты. Диплом табыс ету рәсімі барысында университет басшылары, ректор Е.Ж. Бекмұхамбетов, профессор Г.Д.Кульниязова, факультет деканы Т.С.Абилов және декан орынбасары К.Б.Даржанова құттықтау сөз сөйлеп, түлектерге дәрігерлік қиында қызықты жұмыста ақ жол тіледі, дипломдар мен алғыс хаттар табыс етті. Болашақ дәрігерлер мен ата-аналар университет әкімшілігі мен ұстаздар қауымына алғыстарын айтып, ақ тілектерін білдірді. Салтанатты кеш соңы концерттік бағдарламаға ұласты.
22 маусымда «№2 Ішкі аурулар» кафедарсында 706 топ интерндері «Есірткіге жол ЖОҚ!» атты диспут өткізді. Нашақорлық – күннен күнге өрбіп, көптеген адамдардың өмірін жалмап келе жатқан ғасыр дерті. Ол адамның жеке тұлғасын жойып, зиянды әрекеттің құлына айналдырады. Нәтижесінде адам иллюзия әлеміне енуге ұмтылады. Есірткі нашақордың өміріне ғана емес, сонымен қатар оның достары және туыстарымен қарым-қатынасына да әсерін тигізеді. Нашақорлыққа салынған адам бірте-бірте адамгершілік, тұлғалық құндылықтарын жоғалтады. Бастапқыда, ол күш-қуатының, көңіл-күйінің көтерілуін сезінеді, бірақ бұл ішкі ағзалардың қызметін күшейтіп, ағзаның витаминдерді көп жоғалтуына алып келеді. Зиянды әрекетке байланысты осындай мәселелер шара барысында кеңінен талқыланды. Диспут жүргізушісі, интерн Виктор Зыков, қатысушыларға есірткінің түрлерін және оның адам организміне биологиялық әсерін презентация ретінде көрсетті. Шараға жиналған студент жастар аталмыш дерт туралы өз пікірлерін ортаға салды. Бұл жиылыс мазмұнды өтті.
Маусым айының 16-17 аралығында Шымкент қаласында белбеу күресінен Қазақстан Республикасының кезекті Чемпионаты өтті. Бұл жарысқа ҚР барлық облыстарынан 140-тан астам спортшы қатысты. Ақтөбе облысының атынан Марат Оспанов атындағы БҚММУ «Дене тәрбиесі» кафедрасының оқытушысы Турманова Фариза мен «Медицина-профилактикалық ісі» факультетінің 202 топ студенті Намазбаева Айдана өнер көрсетті. Бұл тартысты додада біздің спортшыларымыз жақсы нәтиже көрсетті. Белбеу күресінен Турманова Фариза 52 кг дейін салмақ дәрежесінде қола медальға қол жеткізді; Намазбаева Айдана 58 кг дейін салмақ дәрежесінде ІІІ орынды иеленді. Дене тәрбиесі кафедрасы және «Сұңқар» спорттық клубы жеңімпаздарды жеңістерімен құттықтайды және алар спорттық асулары алда болсын деп тілейді!  
«Жыл кураторы» байқауы оқу ордамызда кураторлар Кеңесінің ұйымдастыруымен дәстүрлі түрде жыл сайын өткізіліп тұрады. Бұл оқу жылында да аталмыш байқау ұйымдастырылды. Байқаудың мақсаты – 2014-2015 оқу жылы бойынша университеттің тәрбие жұмысы жүйесінде кураторлық қызметті жетілдіру мен қарқынды жүргізу, кураторлық жұмыстың жаңа тәсілін енгізу мен озық тәжірибені тарату, шығармашыл кураторларды анықтау. Байқауға қатысушы кураторлар жетекшілік ететін топтарымен жүргізген жұмыстарымен және университеттің қоғамдық өміріне араласу белсенділігімен бағаланды. Сайысқа қатысуға өтініш берген кураторлардың портфолиосы, студенттердің қатысуымен жасалған буклеттер мен стенд-газеттері комиссия назарына ұсынылды. Комиссия мүшелері байқауға қатысуға өтініш білдірген кураторлардың құжаттарын бірнеше критерий бойынша бағалап, портфолиолардың жинақталу сапасына, ата-аналармен байланыс және студенттер үлгеріміне басты назар аударды. Сонымен қатар, сайыс төрешілері «Куратор студент көзімен» сауалнамасының қорытындысымен таныстырылды. II кезеңге өткен сайыскерлер «Шынықсаң, шымыр боларсың!» (Турманова Ф.С.), «Шын жүректен» (Жұбаназарова Қ.А.), «Ғибратты әңгіме» (Қожабекова Ж.Қ.) тақырыптарында ашық кураторлық сағаттар өткізді. 10 маусымда өткен кураторлар жиналысында «Жалпы медицина» факультетінің 120 «А», «Б» топтарының кураторы Қожабекова Ж.Қ. «Студенттің бос уақытын пайдалану арқылы тәрбиелеу» және аталмыш факультеттің 108 «А», «Б» топтарының кураторы Жұбаназарова Қ.А. «Единство воспитания и обучения в образовательном процессе» тақырыптарында баяндама жасады. Оқылған баяндамалар мағынасы жағынан мазмұнды және терең болды, әсіресе куратор Қ.А.Жұбаназарованың баяндамасында білімді тәрбиемен ұштастыра отыра оқыту барысы жан-жақты ашылды. 2014-2015 оқу жылы бойынша өткізілген «Жыл кураторы» байқауының қорытындысы бойынша: «Жыл кураторы» атағына «Жалпы медицина» факультетінің 120 «А», «Б» топтарының кураторы Қожабекова Жұлдыз Қазиханқызы (431 ұпай), І орынға «Жалпы медицина» факультетінің 108 «А», «Б» топтарының кураторы Жұбаназарова Қаламқас Асылбаевна (427 ұпай), ІІ орынға «Жалпы медицина» факультетінің 116 «А», «Б» топтарының кураторы Турманова Фариза Сандибековна (425 ұпай), ІІІ орынға «Жалпы медицина» факультетінің 102 «А», «Б» топтарының кураторы Балапашев Бекен Сарсенгалиевич (244 ұпай) лайықты деп танылды. Сонымен қатар, «Байқауға қатысқаны үшін» мақтау қағазымен «Жалпы медицина» факультетінің 118 «А», «Б» топтарының кураторы Жугунусова Актеньке Абдыжалимовна (231 ұпай) марапатталды. Жеңімпаз кураторларға медицина қызметкерлері күніне орай өткізілген салтанатты жиналыста бағалы сыйлықтар мен дипломдар табыс етілді.  Байқауға қатысқан кураторларды жеңістерімен құттықтаймыз және еңбектеріне шығармашылық табыстар тілейміз!
Құрметті әріптестер! Сіздерді кәсіби мерекелеріңіз – Медицина қызметкерлері күнімен шын жүректен құттықтаймын! Дәрігер мамандығы – қоғам үшін ең маңызды болып табылатын, адамның денсаулығы мен оның өміріне адал қызмет ететін ең игі, мейірімді мамандық. Бұл мерекені адам тәнінің қиналысы мен қасіретін жүрегімен сезіне білетін денсаулық сақтау саласының барлық қызметкерлерінің, медбикелер мен дәрігерлердің ерен еңбегінің дүйім жұртшылықпен бағаланатын күні деп есептеуге болады. Сөзсіз Сіздердің толассыз еңбектеріңіздің өлшемінде өмір қуанышы мен қайта қауышқан талай адамдардың тағдыры тұр. Сіздердің тәжірибелеріңіз, жанашырлықтарыңыз, мейірім мен кәсіби адалдықтарыңыз ақ халатты жандарды қоғамның ең биік сатысына шығарды. Осындай игілік нұрын төгіп, бүгінгі көлеңкесі қатар жүретін кезеңде ерінбей еңбек етіп, халыққа қызмет ете білгендеріңіз үшін алғысымды білдіргім келеді. Баршаңызға зор денсаулық, еңбектеріңізде табыс, шыдамдылық және парасат пен пайым, қабілет пен қарымыңыздың арқасында биік шыңдардан көріне беріңіздер деп тілеймін!