Жаңалықтар

Мамыр айының 28-29 аралығында Марат Оспанов атындағы Батыс Қазақстан мемлекеттік медицина университетінде отандық және шетелдік ғалымдардың қатысуымен «Балалар денсаулығын және репродуктивті денсаулықты қорғаудың инновациялық технологиялары» атты халықаралық ғылыми-тәжірибелік конференция өтуде. Шара ұйымдастырушысы – Марат Оспанов атындағы БҚММУ. Конференцияның мақсаты – ана мен баланы қорғау саласындағы мәселелердің шешімін табу. Тиімді медициналық және әлеуметтік технологиялардың, заманауи ғылыми зерттеулердің дамуы, сондай-ақ, шетелдік әріптестермен тәжірибе алмасу үшін ғылыми-тәжірибелік базаны құру – осының барлығы Марат Оспанов атындағы БҚММУ табысты жұмысының кепілі болып табылады. Мұндағы басты маңыздылық – жетекші шығармашылық ұжымдар мен институттардың іргелі және қолданбалы ғылым өкілдерімен ашық пікір алмасуы. Шара шеңберінде заманауи репродуктологияның өзекті мәселелері жөнінде авторлардың жеке зерттеулерінің нәтижелері бойынша баяндамалар тыңдалады және аталған жұмыстардың перспективті бағыттары және балалар денсаулығын қорғау саласында заманауи әлемдік жетістіктердің талдауы жүргізілуімен шебер-класстар өткізіледі. Аталмыш конференцияны өткізу университетімізде маңызды оқиға болып табылады. Себебі, бұл шара ана мен баланы қорғау саласындағы мәселені шешуде үлесін тигізетіні және одан әрі жемісті жұмысқа себепші болатыны сөзсіз.
Медициналық көмектің сапасын жақсарту, ауруды, нәрестелер өлімін төмендету мақсатында Атырау облысының денсаулық сақтау саласында аймақта салауатты өмір салтының ұстанымдарын қалыптастыру және енгізу бойынша тұрғындармен мақсаттық бағытталған жұмыс өтуде. Тәжірибелік денсаулық сақтауға көмек беру мақсатында біздің университетіміз Денсаулық сақтау департаментімен тығыз байланыста. Коммуникативтік дағдылар курсымен «№1 жалпы дәрігерлік тәжірибе» кафедрасының профессоры, м.ғ.д., профессор Кульниязова Гульшат Матаевна Атырау қаласында ағымдағы жылдың 26 мамырында өткізілген шараларға белсене қатысты. Әр аймақтың дәрігерлері жиналған «Балалардың дамуы мен денсаулық жағдайын жиынтықты бағалау» тақырыбына арналған ғылыми-тәжірибелік конференцияда профессор тәжірибелік дәрігерлер үшін сәйкес тақырыпта балалардың анатомиялық-физиологиялық ерекшеліктері мен дамуы, балалардың өмірінің алғашқы жылдарындағы тамақтануына басты назар аударылған дәріс оқыды. Сол күні Атырау қ. Балалар клиникалық емханасының базасында әртүрлі дәрігер мамандармен бірге Г.М. Кульниязованың қатысуымен «Аллергияның алдын алу. Толерантты қалыптастыру. Тағамдық аллергия кезінде балалардың тамақтануындағы жаңа көзқарас» тақырыбында дөңгелек үстел өтті. Гульшат Матаевна аймақтағы емдеу мекемелерінде жұмыс жасайтын университетіміздің түлектерінің осы шараларға белсенді қатысқанын көріп, қуанып қалғандығын ерекше атап өтті.
Мамырдың 18-26 аралығында «Жаратылыстану ғылыми пәндері» кафедрасында дәстүрлі 1 курс студенттері арасында «Медбиофизика», «Информатика», «Математика» пәндері бойынша кафедраішілік пәндік олимпиада өткізілді. Пәндік олимпиаданың мақсаты – студенттердің пәнге деген қызығушылықтарын арттыру, логикалық ойлау қабілеттерін шыңдау және пән бойынша білім деңгейлерін анықтау болып табылады. Олимпиада 2 айналымнан тұрды: компьютерлік тест тапсырмаларын орындау және пәндер бойынша күрделендірілген есептерді шешу. 42 студент білімдерін сынап, соның ішінен 26 студент  2 айналымға өтті. Нәтижесінде, Медбиофизика пәні бойынша: І орын – Тажибаева Асем, ІІ орын – Капацын Никита, ІІІ орын – Сулейманов Артурға бұйырды. Информатика пәні бойынша: І орын – Қалдарбек Орынбасар, ІІ орын – Сатаев Диас, ІІІ орынды Қазиханқызы Ақерке иеленді. Математика пәні бойынша: І орын – Ермеков Ермек, ІІ орын – Нургазина Карина, ІІІ орынды Зыбина Любава алды. Олимпиада жеңімпаздары мақтау қағаздарымен марапатталды.
22-23 мамыр күндері «Ақтөбе дамуы» Қоғамдық қорының ұйымдастыруымен «Мұнайшы» демалыс лагерінде «Жас Ақтөбе» жастарға білім беру форумы өтті. Форумға Марат Оспанов атындағы Батыс Қазақстан мемлекеттік медицина университетінен Әлеуметтік-тәрбие жұмыстары орталығының психологы Г.Бисекова бастаған студенттер қатысты. Екі күн өткен форумда қатысушылар «Сен – кәсіпкерсің», «Әлеуметтік белсенділік және еріктілер қозғалысы», «Жетекшілік психологиясы: шешендік өнер», «Шығармашылық шеберхана», «Медиа кеңістік және блогерлік» топтарына бөлініп, әр топқа өз бағыттары бойынша бағдарламаға сай спорттық сайыстар, семинар-тренингтер, концерттік шаралар жүргізілді. Форум соңында «Форумның көшбасшысы» сайланып, қатысушыларға сертификаттар табысталды.
22 мамырда «№2 ішкі аурулар» кафедрасында 603 топ интерндері Дүниежүзілік денсаулық күніне орай шара өткізді. Шараға 1 оқу жылының интерндері қатысты. Дүниежүзілік денсаулық күні 7 сәуір күні аталып өтіледі. 1948 жылы 7 сәуірде Дүниежүзілік Денсаулық Сақтау ұйымының (ДДҰ) жарлығы іске қосылды. Денсаулық күнін атап өту 1950 жылдан бастап дәстүрге айналды. Әр жыл сайын ДДҰ әр Дүниежүзілік Денсаулық күнін белгілі бір тақырыпқа арнайды. Шаралардың өткізілу мақсаты адамдардың өмірі үшін денсаулықтың алатын орны қаншалықты маңызды екендігін түсіндіру болып табылады. Ал денсаулық сақтау ұйымдары адамдардың денсаулықтарын жақсарту мәселесін шешумен айналысады. Шара эстафеталық жарыс түрінде өткізілді. Сайысқа 6 топ қатысты: 601 топ – «Спорт сақшылары», 602 топ – «Адреналин», 603 топ – «Денсаулық», 604 топ – «Пантеры», 605 топ – «Динамит» және 606 топ – «Достық». Шара барлық қатысушыларға арналған 10 минуттық бой жазу жаттығуларын жасаумен басталды. Сайыстың бірінші кезеңі – үй тапсырмасы: әрбір топ өз ұрандары мен эмблемаларын таныстырып өтті. Бірінші кезең бойынша бірінші орынды «Денсаулық» тобы, екінші орынды «Пантеры» тобы, үшінші орынды – «Достық» тобы иеленді. Сайыстың екінші кезеңі эстафета түрінде өткізілді. Нәтижесінде «Достық» және «Денсаулық» топтары ұпай сандары бойынша алға шықты. Сайыстың қорытынды кезеңі келесідей өтті: арқан тартыс: «Адреналин» және «Пантеры» топтары жеңіске жетті, армрестлинг бойынша «Адреналин», «Пантеры» топтары озса, «Динамит» және «Достық» топтары өзара сайысып, намысты қолдан бермеуге тырысты, бадминтон бойынша: «Адреналин», «Денсаулық», «Достық» топтары ерекше көзге түсті. Сайыстың атмосферасында бірліктің лебі есіп тұрды. Әрбір топ қатысушысы өз мүмкіндігін көрсете білуге тырысты, бақталастарын жеңуге барын салумен болды. Әділқазылар жарыстың қорытындысын шығарғанша, ұйымдастырушылар қатысушылар арасында би ұйымдастырды. Жарыс нәтижесі келесідей болды: I орын - «Достық» тобы, II орын - «Пантеры» тобы, III орын - «Денсаулық» тобы. Сайыс қорытындылары жарияланғаннан кейін кафедра жетекшісі барлық қатысушыларға ризашылығын білдіріп, шараны ұйымдастырушыларға алғыс айтты және барлық интерндерге спортта да, оқуда да озат болуларын тіледі.